04.11.2025. шаҳри Душанбе. Имрӯз бо иштироки кормандони Раёсати сармоягузорӣ ва идораи молу мулки давлатии шаҳри Душанбе хониши сиёсӣ бахшида ба таҷлили Рӯзи Конститутсияи Ҷумҳурии Тоҷикистон баргузор гардид.
Хониши сиёсӣ бо суханронии сардори Раёсат оғоз гардида, таъкид шуд, ки Конститутсия ҳамчун санади олии ҳуқуқӣ бо истиқлоли давлатӣ робитаи ногусастанӣ дошта, пойдевори назму низом ва сулҳу субот ба ҳисоб меравад. Қайд гардид, ки ин санади миҳиму зарурӣ пояҳои давлатдориро устувор менамояд, роҳи минбаъдаи таҳким ва пешрафти давлатдории миллиро муайян мекунад.
Омӯзиши таърихи ташаккули Конститутсия ҳамчун пойдевори ҷомеаи одилона ва сулҳу суботи устувор нишон медиҳад, ки шарафёб гардидан ба ин санади барои мардуми тоҷик басо муқаддас бо роҳи осон муяссар нагардидааст.
Зеро дар оғози давраи ба истиқлол расидани Тоҷикистон, ки дар натиҷаи фурӯпошии давлати абарқудрати вақт сурат гирифт, мамлакати мо гирифтори буҳрони шадиди сиёсиву гуманитарӣ ва ҳодисаҳои фоҷеабор гардид. Ҳамин тавр, тобистону тирамоҳи соли 1992 оташи ҷанги шаҳрвандӣ рӯз ба рӯз аланга гирифта, раванди фаъолияти мақомоти давлатӣ, махсусан, мақомоти ҳифзи ҳуқуқ пурра фалаҷ гардид.
Бо қабули Конститутсия дар инкишофи давлатдории Тоҷикистон марҳалаи нави таърихӣ оғоз гардида, ислоҳоти сиёсӣ, ҳуқуқӣ ва иқтисодиву иҷтимоӣ гузаронида шуда, пойдевори мустаҳками низоми сиёсиву ҳуқуқӣ ва иқтисодиву иҷтимоӣ гузошта шуда, Тоҷикистон сиёсати сулҳҷӯёнаро ба амал татбиқ намуда, соҳибихтиёрӣ ва истиқлолияти дигар давлатҳои ҷаҳонро эҳтиром намуд ва муносибатҳои хориҷиро дар асоси меъёрҳои байналмилалӣ муайян кард.
Дар фарҷом таъкид гардид, ки барои ҳамеша побарҷо мондани пояҳои Конститутсия ҳамаи моро мебояд, ки ба миллату Ватани хеш поквиҷдонаю софдилона хизмат намоем.
English 